أشكال لارضيات المنزل

**Admin** السبت يناير 23, 2010 3:57 pm

تعالوا المرّة دي نتكلم عن أرضيات المنزل.. فيه أنواع كتيرة من الأرضيات زي الرخام والخشب والسيراميك والموكيت وhdf..

وطبعا كل بيت بيعمل الأرضيات على حسب الإمكانيات المادية وعلى حسب طريقة الفرش وعلى حسب الذوق وتعالوا نتكلم عن كل حاجة بالتفصيل..

أشكال الباركيه

وهو فيه منه أنواع كتيرة جدًّا وأشكال كتيرة جدًّا من الأخشاب اللي ممكن نعمل بيها الأرضية الباركيه.

الباركيه التقليدي

وفي الغالب بيكون خشب زان وده فيه طريقتين لتركيبه:
الطريقة الأولى: ودي الأسهل والأرخص وهي لزقه.

الطريقة التانية: ودي الأصعب والأغلى وهي الباركيه المسمار.

والنوع ده من الباركيه في الغالب بيليق أكتر على الأثاث الكلاسيكي.

وفيه أشكال كتيرة لتركيب الباركيه أشهرها "سبعات وتمانيات" وده بيليق على الأثاث الفرنساوي، و"رصة الطوب" وده بيليق على الأثاث الإنجليزي.

الباركيه الموسكي

وده بيكون من خشب الموسكي ومن الأفضل إننا نحطه في أوض النوم، وممكن نحطه في الريسبشن لو كنا هنفرش مودرن أو عربي، وبيكون ألواح كبيرة من الخشب وبياخد شكل رصة الطوب.

إزاي ندهن الباركيه..؟

جميع أنواع الباركيه بعد ما بنركبها بتتقشط وبتدّهن بلاستيك وفيه أنواع كتيرة من البلاستيك، ففيه البلاستيك المطّ اللي هو مش بيلمع، وده بيكون أفضل مع العفش المودرن، وفيه البلاستيك اللي بيلمع وده بيليق أكتر مع العفش الكلاسيكي.

ونخلي بالنا إن الأرضيات الخشب بتحتاج إلى عناية في تنظيفها، ومن عيوبها إنها بتتجرح لو جروا عليها أي حاجة، ولازم يكون فيه مواد خاصة لتنظيفها زي "الورنيش" ونحاول دايما إننا ما نجيبش عليها مية لأنها أكتر حاجة بتبوظها.

يستحسن كمان ما نصبغش الخشب ونسيبه بلونه الطبيعي لأن لما هنصبغ هيبقع وهيكون شكله مش حلو.

شياكة الرخام

فيه أنواع كتيرة جدًّا من الرخام وألوان كتيرة كمان ومن أرخص وأشهر الأنواع الفليتو والجلالة ودول لونهم بيكون بيج وفيه السرباجانتي وده كمان لونه بيج بس غالي وفيه الإربيسكاتوا وده لونه أبيض ومعرّق بالرمادي وهو شبه الكرارة الإيطالي وفيه الرخام الأغدير وده لونه نبيتي وفيه رخام لحم الهوانم وده لونه سيمون، وفيه الأخضر الهنيدي وفيه طبعا الأسود..

وفيه كمان الجرانيت وده من مشتقات الرخام وده لا يفضّل عمله في المنزل لأنه بيكون غير مناسب في المنزل، وبيكون مناسب أكتر في المحلات.

طبعاً الرخام بيدّي شياكة لو عملنا بيه أرضية الريسبشن، وممكن نعملها باللون البيج، ونعمل بوردر بألوان مختلفة زي النبيتي أو الأخضر.

كمان مدخل البيت ممكن نحط فيه سجادة مصنوعة من الرخام اسمها "ووتر جيت" ودي بتكون عبارة عن قطع صغيرة من الرخام تتعشق مع بعض بتدي شكل جميل ودي بنفضل إننا نحطها في مدخل الشقة بدل السجادة المنسوجة.

كمان فيه حمامات ممكن تتعمل من الرخام بيكون شكلها حلو قوي..

وعلى فكرة كل ما قطع الرخام كانت أكبر كل ما كانت أحلى وطبعا الرخام بيكون فيه تجزيعات طبيعية ورسومات طبيعية ولازم نقف مع الصنايعي وهو بيركب الأرض علشان نتأكد إنه بيعمل الرسومات بشكل تكون ماشية فيه مع بعضها.

السيراميك لازم يكون سادة

السيراميك ممكن يتعمل بيه الريسبشن بس على شرط يكون سادة مش منقوش، ويكون واخد شكل الرخام أو الحجر أو الخشب..

والسيراميك والرخام غير مستحب إنه يتعمل بيهم أوض النوم لأنهم بيدوا برودة جامدة جداًَ في الشتاء على الرغم من سهولة تنظيفهم.

Hdf أشكاله كتير لكن..

وده خشب صناعي ممكن نعمل بيه البيت كله وعيبه الوحيد إنه بيعمل صوت لما بنمشي عليه، وفيه منه أشكال كتيرة قوي شبه الخشب، وفيه منه بعض الأشكال اللي عليها رسومات زي رسومات الورد والأشجار ودي ابعدوا عنها تماما.

الموكيت جميل ولكن

طبعا كلنا عارفين الموكيت بيكون عامل زي السجاد وبنكسي بيه الأرض كلها وهو بيدي جمال للبيت، ولكن فيه أبحاث كتير أثبتت إنه خطر على الصحة فيا ريت في رأي نستبعده تماما..

وعلى فكرة الأرضيات في أي حاجة لازم تكون سادة ونبعد عن الرسومات.